លោកមេធាវី កែត ឃី បានឲ្យដឹងថា រហូតដល់ពេលបាយថ្ងៃត្រង់ ការសាកសួរលើ តំណាងរាស្ត្រជាប់ឆ្នោត ចំនួន ៥ រូប ត្រូវបានបពា្ចប់ ដោយព្រះរាជអាជ្ញា កែវ សុជាតិ។
តំណាងរាស្ត្រទាំង ៥ រូប របស់គណបក្សសង្គ្រោះជាតិ ដែលត្រូវបានចាប់ខ្លួន និងបញ្ជូនទៅតុលាការនោះ រួមមាន៖ លោកស្រី មូរ សុខហួរ លោក ម៉ែន សុថាវរិន្ទ្រ លោក ហូរ វ៉ាន់ លោក កែវ ភារម្យ និងលោក រៀល ខេមរិន្ទ្រ។ តំណាងរាស្ត្រជាប់ឆ្នោតគណបក្សសង្គ្រោះជាតិ ទាំង ៥ រូប ត្រូវបានចាប់ខ្លួន ដោយអាជ្ញាធរសមត្ថកិច្ច ភ្ជាប់ការទទួលខុសត្រូវ ទៅនឹងបាតុកម្មរំដោះទីលានប្រជាធិបតេយ្យ កាលពីព្រឹកថ្ងៃទី១៥ ខែកក្កដា ឆ្នាំ២០១៤។ បាតុកម្មនោះ កើតមានអំពើហិង្សា រវាងអាជ្ញាធរសមត្ថកិច្ច និងក្រុមបាតុករ បណ្តាលឲ្យរបួសទាំងសង្ខាង។
កាលពីម៉ោង ១១ ព្រឹក ថ្ងៃទី១៦កក្កដានេះ ប៉ូលិសបានចាប់ខ្លួនតំណាងយុវជនគណបក្សសង្គ្រោះជាតិម្នាក់ទៀត គឺលោក អឿ ណារិត ជំនួយការលោកស្រី មូរ សុខហួរ ហើយបញ្ជូនទៅកាន់ស្នងការដ្ឋាននគរបាលរាជធានីភ្នំពេញ។ នេះបើតាមអង្គការសិទ្ធិមនុស្ស លីកាដូ។
ប៉ុន្តែលោកមេធាវី កែត ឃី បានបញ្ជាក់ថា លោក អឿ ណារិត ត្រូវបានប៉ូលិស បញ្ជូនចូលតុលាការ បន្ទាប់ពីការចាប់ខ្លួន ហើយត្រូវបានព្រះរាជអាជ្ញារង សួរនាំរួចរាល់ហើយ គិតត្រឹមពេលបាយថ្ងៃត្រង់។
ជាការកត់សម្គាល់ ក្នុងពេលតំណាងរាស្ត្រជាប់ឆ្នោតទាំង ៥ រូប ត្រូវបានប៉ូលិស បញ្ជូនទៅកាន់តុលាការ កាលពីព្រឹកព្រលឹម ថ្ងៃទី១៦កក្កដានេះ គឺផ្លូវនៅជុំវិញ និងនៅមុខតុលាការ ត្រូវបានបិទ ខណៈដែលមានអ្នកគាំទ្រជាច្រើន បានប្រមូលផ្តុំ ស្រែកទាមទារឲ្យតុលាការដោះលែងតំណាងរាស្ត្រជាប់ឆ្នោតទាំងនោះ។
តំណាងរាស្ត្រជាប់ឆ្នោតទាំង ៥ រូប ត្រូវបានប៉ូលិសចាប់វ៉ៃខ្នោះ ដាក់ដៃស្លាបសេកទៅក្រោយ។ សូម្បីតែដេកក្នុងបន្ទប់ នៅស្នងការនគរបាលរាជធានីភ្នំពេញ ក៏តំណាងរាស្ត្រចាប់ឆ្នោតទាំង ៥ រូប ត្រូវប៉ូលិសដាក់ខ្នោះផងដែរ។
លោកមេធាវី កែត ឃី បានបញ្ជាក់ថា នៅតុលាការ នាពេលសម្រាកពីការសួរ យកចម្លើយពីព្រះរាជអាជ្ញារង តំណាងរាស្ត្រជាប់ឆ្នោត ទាំង ៥ រូប និងលោក អឿ ណារិត ត្រូវបានប៉ូលិស វ៉ៃខ្នោះដៃជាប់។
0 comments:
Post a Comment